“Hopefully that for you and us will work together iregardless of any political affiliation. Walay pagpili ba sa bulok sa pulitika, sulayan daw nato.”
– Gobernador Bambi Emano

Nagkatapok ang tanang local chief executives kon mga kadagkuan gikan sa 23 ka lungsod ug duha ka dakbayan sa lalawigan sa Misamis Oriental alang sa ilang orientation and dialogue mahitungod sa priority health outcomes sa probinsya ug hisgutanang Universal Health Care, adlawng Martes- Nobyembre 26, 2019 sa Limketkai Luxe Hotel, CDO City.

Tumong sa maong kalihukan nga madunggan ang tanang problema gikan sa nagkadaiyang lugar mahitungod na sa maayong panlawas aron nga maklaro ug maoy magamit nga common ground para sa hiniusang pag-uswag ngadto sa gikahinamang pagpatuman sa Universal Health Care dinhi sa lalawigan.

Human sa maong panaghisgot, napamatud-ang priority health outcomes sa Misamis Oriental kung asa angayang tagaaan sa igong pagtagad mao ang Maternal Health, Tuberculosis, Rabies, ug Childhood Diarrhea.
Ang mga lungsod sa Initao, Opol, ug ang dakbayan sa El Salvador lamang ang wala nakatambong ning higayona kung diin panghinaot gihapon ni Gobernador Emano ang ilang kooperasyon alang sa kalampusan sa nasangpit nga lakang.

Ang Zuellig Family Foundation nga gatabang sa tanang local governments aron sa pagpauswag sa mga nagkadaiyang health programs nga maoy nangulo sa dialogue nakadayeg ni Gobernador Emano. Si Provincial Health Leadership and Governance Program (PLGP) manager nga si Mr. Jerry Jose nagpaabot sa iyang pasalamat tungod sa sinseridad ni Emano sa pagpangulo sa tanang local chief executives.

Daku usab ang pasalamat sa tanang mayores nga mitambong sa usa ka adlaw nga dialogue kay nahatagan sila sa tingog aron mapalanog ang nagkadaiyang suhestiyon aron sa katumanan niining UHC para sa lalawigan.

Pagalauman nga sa sumusunod adlaw o bulan, masundan pa sa series of dialogues ug igong collaboration sa tanan ngadto na sa implementasyon sa Universal Health Care ug pagpalambo sa tanang health programs alang sa pangkinatibuk-ang kaayuhan sa Misamis Oriental.

Tuod man ang hiniusang pagpatuman sa paghatag prayoridad alang sa mga serbisyo sa maayong panlawas, bililhon alang kay Gobernador Bambi Emano tungod kay daku ang kahimuan niini karon ug sa umalabot henerasyon hilabina sa tanang Misamisnon.