Sugod karong adlawa, Lunes, Setyembre 16, 2019, mobalhin na buhatan sa Provincial Tourism sa Misamis Oriental, sa ilang bag-ohay pa lang natukod nga gambalay tonga-tonga sa Capitol Park.

Matud ni Provincial Tourism Officer Atty. Jeffrey Saclot, mas hamugaway, luag ug desenteng buhatan sa turismo-probinsiyal ang mabisitahan sa tanan nilang kliyente sugod sa nasangpit nga adlaw.

Hinuon, wala pa gayud hingpit nga ma-kompleto ang construction sa Provincial Tourism and Pasalubong Center sa kapitolyo nga mobalor sa P10 milyones.

Matud ni Gobernador Bambi Emano, kung hingpit na kining mahuman, adunay kapehanan ug display sa mga produktong pagkaon ug pang-pasalubong nga produkto alang niadtong mga turista sa lalawigan.

Dugang sa gobernador, ang provincial tourism office cum pasalubong center, mahimong tulay sa tanang kliyente alang sa ilang mga negosyo, hilabina sa travel guide industry ug promotion sa ilang mga tour packages.

Hilabihan nga kalipay uyamot ni Gobernador Bambi Emano nga bukas na gayud sa publiko ang bag-ong gambalay alang sa pagpalapad sa programa niini sa turismo, ang programa nga wala intawon gidahum sa tanan nga maoy pinaka-hinungdan sa pagkunhod sa ihap sa kapobrehon sa lalawigan sa Misamis Oriental ug dakbayan sa Cagayan de Oro.