ISIP opisyal nga representante ug kandidata gikan sa Misamis Oriental karon tuiga nga edisyon sa Binibing Pilipinas 2020, gibandera ni Cinderella Faye Obeñita ang adbokasiya sa Tourism Office sa probinsya.
Mao kini ang pagpakusog sa potensyal sa mga lokal nga destinasyon sa probinsya isip usa sa iyang mga adbokasiya.

Sa iyang #IAMBinibini introduction video, mapasigarbuhon nga gihisgutan ni Ms. Obeñita ang iyang trabaho isip Tourism Operations Officer sa probinsya ug ang iyang pagpaningkamot nga makab-ot ang inadlaw-adlaw nga tumong sa Provincial Tourism Office nga mao ang pagpromotar sa daghang local tourism destinations sa probinsya.

Gipakita usab sa video nga malantaw sa youtube channel sa Binibining Pilipinas ang mga sikat nga destinasyon sa Misamis Oriental sama sa Divine Mercy Shrine sa siyudad sa El Salvador, Tubajon Aquamarine Park sa lungsod sa Laguindingan, ug Agutayan White Island sa lungsod sa Jasaan.

Ang adbokasiya ni Ms. Obeñita mahinungdanon kaayo sa lalawigan gumikan ang turismo mao ang flagship program ni Governor Bambi Emano ug kini nagsumikad sa pagtoo sa gobernador nga kung mapasigarbo ang turismo sa probinsya dako ang potensyal niini nga usa sa mga nag-unang tinubdan sa ekonomiya ug panginabuhian sa katawhan.