PREPARADO na, apan aminado si Miss Kuyamis 2019 Ms. Chella Falconer nga pressured kaayo kini alang sa umalabot nga Miss Millennial 2019 sa Eat Bulaga, kung diin siya ang pambato sa Misamis Oriental sa nasangpit nga national pageant.

Dili malikayan ni Ms. Chella nga ma-pressure, hilabina kaniadto si Miss Kuyamis 2017 Berjayneth Chee sulod sa top 10, samtang si Miss Kuyamis 2018 Ms. Danna Rose Socaoco nahimong first runner-up sa Miss Millennial sa Eat Bulaga sa managsunod nga tuig. Naglaum karon ang katawhan hilabina ang Miss Millennial fans nga masungkit na ni Ms. Falconer ang korona.

Apan matud ni Provincial Tourism Officer Atty. Jeffrey Saclot, ang number one stage-person ni Ms. Chella, dili lang kini mabalaka kon unsa man ugaling ang resulta, ang importante ihatag sa dalaga ang tanan niya nga makaya. Gidayeg pa sa dalaga nga tubo sa Medina, Misamis Oriental, si Gobernador Bambi Emano, kinsa nagpahayag ug nagpakita sa iyang all-out support sa laraw sa tanang MisOr beauty queens sa local man o national stage.

Karong umalabot Agosto 31, 2019, adlawng Sabado, mao ang grand launching sa Search for Miss Millenial 2019, kung hain pormal nga ipaila-ila ang tanang dalaga nga mosalmot sa nasangpit nga indigay ug kon unsa nga probinsiya ang ilang gi-representahan, kon unsay anaa niini nga mga tagong hiyas, ug mga kultura.

Pila na lang ka adlaw, Search for Miss Millennial na sa Eat Bulaga!.

Mao na lamang ang hangyo’g panawagan ni Gobernador Bambi Emano nga unta ubanan ug duyogan sa katawhan ang laraw ni Ms. Chella Falconer sa national stage.