Si reigning Miss Kuyamis 2020 Isobel June Teaño ang pambato karon sa Misamis Oriental ngadto sa Miss Earth Philippines 2020. Matud sa dalaga nga gikan sa lungsod sa Opol, dakung hagit kini alang kaniya.

Admitado si Isobel nga taas ang pressure sa iyang pagsalmot sa Miss Earth Philippines hilabina mao pa kini ang iyang unang higayon nga morampa sa national stage. Apan, tungod kay nagtuo kini nga anaa sa iyang likod ang katawhan sa lalawigan, dili imposible ang pagsungkit sa korona sa Miss Earth Philippines.

Matud sa dalaga, sakyan na lang niini ang pressure total duha naman ka kandidata gikan sa Misamis Oriental ang nakasungkit og korona sa national pageantries. Kinahanglan lamang kono niya ihatag ang tanan ug “magpakatutoo” lang sa iyang kaugalingon aron dili maulahi sa indigay sa kaanyag ug kalantip sa salabotan.

Butyag pa ni Miss Isobel Teaño, nagpadayag na sa ilang suporta si Provincial Tourism Officer Atty. Jeffrey Saclot ug Gobernador Bambi Emano sa iyang laraw sa national stage karon nga tuig. So, walay hinungdan mahadlok o mawala ang iyang confidence sa pagsungkit sa korona sa Miss Earth Philippines 2020.