EXCITED na ang tanan alang sa pagpauli ni Ms. Ana Monica Tan, ang bag-ohay pa lang na-koronahan isip Miss Philippines Air 2019 sa bag-ohay pa lang gipahigayon nga coronation night sa Miss Philippines Earth 2019 sa Okada Manila, Parañaque, Metro Manila.

Magarbuhon uyamot nga motagbo ang katawhan sa Misamis Oriental ug dakbayan sa Cagayan de Oro kang Ms. Ana Monica sa ipahigayong homecoming niini karong Lunes, Hulyo 29, 2019, kung diin ubay-ubay nga kalihukan ang gi-andam alang sa paghatag pasidungog sa tubong Tagoloan.

Miss Philippines Air 2019 maoy titulo ni Ms. Tan isip first runner-up sa nasangpit nga indigay.

Si Atty. Jeffrey Saclot sa Misamis Oriental Provincial Tourism Office nagkanayon ang homecoming maatol sa pagpahigayon sa sinemanang pagpakayab sa nasudnong bandila sa kapitolyo probinsiyal, kung diin si Gobernador Bambi Emano mismo ang motunol ug pahalipay ngadto sa dalagang maanyag, talentado ug adunay malantip nga salabotan.

Human sa pagpakayab sa nasudnong bandila, mosunod dayon ang motorcade sa beauty queen, una pa dayon ang ipahigayon nga press conference, aron kumustahon sa mga miyembro sa prensa ang dalaga sa iyang bag-ong nasakmit nga kadaugan sa nasangpit nga indigay, ug kon unsay mga plano niini sa mosunod nga mga adlaw.

Dugang ni Atty. Saclot, moduyog sa ilang kalipay ang mga miyembro sa Association of Tourism Officers sa Misamis Oriental (ATOM). Atangi ang homecoming sa Facebook live streaming sa Provincial Tourism Office-Misamis Oriental ug Mis.Or. Provincial Information Office.

Si Miss Philippines Air 2019 Ana Monica Tan isa lamang sa daghanang produkto sa Kuyamis Festival sa lalawigan sa Misamis Oriental, nga nagbitbit og kadungganan sa ilang pagpauli sa ilang yutang ginikanan. Ang Kuyamis Festival natukod panahon pagpungko ni Gobernador Bambi Emano sa kapitolyo niadtong tuig 2013, sa tumong ug tinguha nga mapalanog sa tibuok kalibotan kon unsa ka daghan ang maanyag, talentado ug malantip nga salabotang representante sa lokal, national, ug international arena.