USA lamang ang buhatan sa Misamis Oriental Provincial Jail (MOPJ) sa hilabihan nga maapektohan niining pagpugong sa annual budget gumikan sa Temporary Restraining Order (TRO) nga gipakanaog sa korte.
Matud ni Provincial Jail Warden Dominador Tagarda nga tungod kay mapugngan ang pagpagawas may kalambigitan sa pundo posible sab nga mahunong ang tanan nga mga pagdungog sa korte kay gani bisan tulo sa gasolina dili pwedeng gamiton.
“Kini nagpasabot nga atong mga court hearings ma pending, kay even a single drop of gasoline, dili ta pwede.” matud ni Tagarda.
Dugang pa niini nga ang problema sa adlaw-adlaw nga galastuhon alang sa pagpakaon sa kapin 500 ka mga binilango ug ang mga posibleng reklamo tungod sa mamahimong kakulangon sa pagserbisyo niini.
“Ang atong ipakaon sa atong mga piniriso sa pamahaw, paniudto, panihapon wala pud. Naa gyu’y dako nga reklamo mahitabo kung magutman ang atong mga binilango”. nabalaka nga sulti ni Warden Tagarda.
Apan pasalig niini nga magpadayun ang ilang pagserbisyo sa mga binilanggo taliwala sa hagit sa kalisod nga ilang dangatan tungod sa pagpa-undang sa pag-gamit sa salapi nga iya sa gobyerno.
Bisan pa man niining giatubang nga pagsulay sa probinsya, panahon sa pandemya positibo si Warden Tagarda inubanan ni Governor Bambi Emano ug uban mga kaabag niini nga pagabuhaton ang tanang legal nga lakang masolusyonan lamang og mahibalik sa kinabag-ang katawhan sa Misamis Oriental ang serbisyo alang kanila.