GIDUMOG sa katawhan ang motorkada ni Miss Philippines Air 2019 Ana Monica Tan niadtong Lunes, Hulyo 29, 2019, dinhi sa dakbayan sa Cagayan de Oro ug lalawigan sa Misamis Oriental, atol sa homecoming sa dalaga gikan sa indigay sa Miss Philippines Earth 2019 didto sa Okada, Manila, niadtong Hulyo 10.

Taliwala sa kainit sa panahon, all-smiles gihapon nga miwagayway sa iyang mga kamot si Ms. Ana Monica ngadto sa iyang mga fans.

Gikan sa kapitolyo, milibot-suroy ang dalaga sa dalan Velez, tuyok sa divisoria, padulong sa Carmen, hangtud na dayon sa LimKetKai Center, nga wala sukad mahimo sa kagamhanan sa Cagaya de Oro sulod na sa unom ka tuig.

Pasensiyosong naghulat ang mga fans sa kadalanan sa ilang idolo nga pinakaulahing nagdala’g kadungganan dili lamang sa Misamis Oriental, apan lakip na sa dakbayan sa Cagayan de Oro.

Flying kiss dinhi, flying kiss didto ang 23-anyos nga dalaga, nga gibaliwala lamang ang kainit sa panahon, aron lamang personal nga mapasalamatan ang katawhan nga nagpaluyo sa iyang laraw didto sa national stage.

Human sa iyang motorkada, giatubang ni Ms. Ana Monica ang mga miyembro sa prensa sa lalawigan ug dakbayan sa Cagayan de Oro, aron usab mapadangat ang iyang pasalamat ngadto sa katawhan, ngadto kang Provincial Tourism Officer Atty. Jeffrey Saclot, ug Gobernador Bambi Emano, kinsa hugot nga nagsuporta sa mga laraw sa mga beauty queens nga mag-representar didto sa kaulohan.