MALIPAYONG gipahibalo ni Gobernador Bambi Emano sa katawhan sa Misamis Oriental ug Cagayan de Oro nga aprubado na ni Department of Public Works and Highways Sec. Mark Villar ang P2 bilyones nga pundo alang sa pag-semento sa kadalananan sa weste nga bahin sa lalawigan nga moagi boundary sa nasangpit nga dakbayan padulong sa lungsod sa Opol hangtud na dayon sa lungsod sa Lugait.

Laing benepisyo na usab kini nga matunol ni Gobernador Emano alang sa katawhan sa Cagayan de Oro, Opol, Laguindingan, Alubijid, padulong na dayon sa Lugait, hilabina sa mga mag-uuma sa kabukiran ug gagmay’ng negosyante.

Ang nasangpit nga proyekto gitawag sa gobernador og Misamis Oriental West Diversion Road (MOWDIR), maoy tubag pohon sa huot nga trapeko sa dakbayan sa Cagayan de Oro, kung diin mahimo na dayon kining diversion road alang sa motorista padulong sa west side Misamis Oriental.

“Kaluoy sa Diyos, sa atubangan ni Engr. Jun Balo nakaatubang ta kay Secretary Mark Villar, and I have to tell our people especially Opol to Lugait area nga nag-commit na si Sec. Mark Villar nga iya gyung matabangan ta pagsemento anang MOWDIR. Initially, P2 billion ang iyang ihatag,” pahibalo sa gobernador atol sa sinemanang pagpakayab sa nasudnong bandila sa kapitolyo, Enero 27, 2020.

Maayo na lang dunay susama kang Gobernador Bambi Emano nga nangita’g pamaagi aron maluagan ang huot kaayo nga trapeko sa siyudad, nagpakatakos nga moduol kang Sec. Mark Villar aron lamang matunolan sa pundo alang sa pag-semento sa kadalanan nga mosulbad sa huot nga trapeko sa nasangpit nga dakbayan.