BALOR P2 milyones nga pundo ang gitunol ni Gobernador Bambi Emano sa Brgy. Argayoso lungsod sa Manticao ning bag-o. Kini alang sa pagtibawas sa covered court sa nasangpit nga barangay.

Hilabihan ka malipayon ang katawhan sa barangay Argayoso tungod sa laing proyekto nga matukod sa ilang lugar, kung diin ang pundo gitunol mismo ni Gobernador Emano atol pa gayud sa gipahigayon nga Brgy. Tony Program ni Mayor Antonio Baculio niadtong biyernes, Oktubre 11, 2019.

Didto usab mitambong Bise Mayor Stephen Tan sa nasangpit nga lungsod kauban ang mga miyembro sa Sangguniang Panlalawigan, susama ni Board Member Boboy Sabal, Saysay Emano, Dexter Yasay, ug Nancy Madjos, kinsa nahimong saksi sa pagtunol sa cheke ngadto kang Kapitan Vengie Amboayan.
“Dako kog pasalamat sa gihatag ni Gob. Bambi Emano nga 2 milyon sa completion sa among Covered Court, hangtud sa hangtud na namo ni magamit ug daghan kayong salamat sa probinsya ug sa tanang staff ni Gov. apil napud sa partido Padayon Pilipino” matud ni Hon. Vengie Amboayan. Nanghinaut usab ang Kapitan nga unta magpadayon pa hangtud sa sunod pang mga katuigan ang iyang paghatag serbisyo sa katawhan.
Gikalipay usab ni Mayor Tony Baculio ug sa katawhan sa lungsod sa Manticao ang pagdala ni Gob. Bambi Emano sa Barangay Empowerment atol sa Barangay Tony Program sa Argayoso, Manticao. Dinhi ubay ubay nga mga ayuda sa kalambuan ang gitunol sa Kagamhanang Probinsyal sa maong lungsod.

Kini naglangkob sa Php300, 000 para sa Brgy Tuod alang sa polyethyline Pipe sa ilang water system project,
dugang Php 300,000 sa Brgy Poblacion alang sa pag improbar sa ilang Multi-purpose building Type/¬perimeter,fencing,dem¬olition and hauling of debris ug ang laing Php300,000 sa Brgy Paniangan alang sa ilang road rehabilitation project.
Saludo si Gobernador Emano sa pamunuan ni Manticao Mayor Baculio ug Kapitan Amboayan sa ilang kaikag sa pagsilbi sa katawhan bisan pa man mihupas na ang kainit sa piliay. Nanghinaut pa kini nga magpadayon ang ilang kainit sa pagpangalagad tungod kay utang kabubut-on nila kini sa tawo nga maoy nagbutang kanila sa pwesto.