NAGTUNOL ang Panggamhanang lokal sa Misamis Oriental ubos sa padumala ni Gobernador Bambi Emano og mokabat 250,000 ka pesos ngadto sa Provincial Federation of Women Association (PROFEWA-KALIPI) dungan sa sinemanang
virtual flagraising ceremony sa Kapitolyo Probinsyal.

Gipasabot ni Mr. Jhunleymar Abella ang Head sa Provincial Social Welfare and Development Office (PSWDO) nga gikan sa buhatan ang pundo ug bahinon kini ngadto sa asosasyon sa 23 ka munisipyo, duha ka dakbayan sa lalawigan alang sa ilang tag P10,000 nga livelihood assistance.

Ang asosasyon girepresentahan sa Presidente sa Provincial Federation of Women Association (PROFEWA) – KALIPI sa Misamis Oriental nga mao si Ms. Ann Jennifer Lagrosas kinsa maoy personal nga midawat sa tseke sulod sa Provincial Governor’s Office.

Dugang ni Mr. Abella nga makatabang kini sa sektor sa kababayen-an hilabina karon panahon sa pandemya

“Kini nga livelihood assistance this will help to empower among women sa atong mga women’s sector nga ma-engage sila into livelihood activities, kini maong mga assistance nga ihatag kanila Ilang gamiton sa ilang livelihood nga naa na sa ilang munisipyo or gani kong wala paman livelihood of their choice,” butyag niini.

Sa iyang bahin, malaumon si Governor Bambi Emano nga unta mas mulambo kining asosasyon pinaagi sa financial assistance nga gihatag ug gitabang alang kanila kay kini dako og tabang sa panginabuhian niining dili tiaw ang epekto nga hatod sa Corona Virus Disease (Covid-19).