Gisubhan na karong adlawa, Septyembre 9, 2019, ang P3 milyones balor nga “Bulilit Center”, ang proyekto ni Gobernador Bambi Emano nga gihatag katumanan sa Provincial Early Childhood Care and Development Office (PECCDO) nga gipangulohan ni Ms. Maryden T. Ocot.

Nahimutang gayud kilid sa Farmers Market matukod ang nasangpit nga gambalay nga halad sa gobernador sa kabataan isip tabang alang sa kalamposan sa pagkab-ot sa ilang maayong kaugmaon.

Ang pundo sa maong proyekto gikan sa General Appropriations Act (GAA), kung diin nakaharbat og pahat ang pangagamhanang lokal sa Misamis Oriental pinaagi sa sulat-hangyo ni Ms. Ocot ngadto sa nasudnong pangagamhanan.

Ang Bulilit Center isa ka education facility alang sa nag-edad 3-4.11, ug panghingusgan nga maapil ug tanyag ang ITED (Infant Toddler Education) hilabina sa mga anak sa mga empleyado sa kapitolyo ug mga kasikbit nga nasudnong buhatan, aron mas sayon kanila ang pag-monitor sa mga bata samtang sila nanarbaho.

Gi-bendisyunan kini agi ug panalangin ni Fr. Juliano Retiquez ug giduyogan mismo ni Gobernador Bambi, ug gisalmotan usab sa mga opisyales sa Sangguniang Panlalawigan nga sila Board Member Gerardo Sabal III, Board Member Dexter Yasay, Board Member Leonard Winstanley, Board Member Kerwin Soldevilla, ug bag-ohay pa lang nahimong miyembro sa Sanggunian, si ex-officio Board Member Mitchele Anayron sa Philippine Councilors League (PCL).

Gikalipay uyamot sa amahan sa lalawigan, Gobernador Bambi Emano ang proyekto. Gani, personal niini nga gipasalamatan ang pangulo sa PECCDO nga si Ms. Ocot tungod sa hago ug paningkamot nga gipakita niini sa tinguha nga mahatagan gayud sa katumanan ang mga pangandoy sa gobernador alang sa iyang pinalanggang bulilit.