SA gipahingusgan nga pagpatuman sa Executive Order 2019-13 ug 2019-14 kon pagdili sa pagpasulod sa baboy, karneng baboy ug mga produktong gama sa karneng baboy dinhi sa tibuok Misamis Oriental, dugang ayudang pinansiyal ang gitunol ni Gobernador Bambi Emano ngadto sa kapulisan sa tinguha nga mapalig-on pa ang implementasyon sa nasangpit nga kasugoan.

Mismong si Gobernador Bambi ang nagtunol sa mikabat P324,000 nga cash assistance ngadto sa Philippine National Police-Misamis Oriental Provincial Office pinaagi ni P/Col. Robert Roy Bahian ug iyang mga kaubanan alang sa ilang meal allowance hilabina sa mga elemento sa Lugait Quarantine Station, atol sa sinemanang pagpakayab sa nasudnong bandila sa kapitolyo, Lunes, Nobyembre 11, 2019.

Didto sa kalihukan sila si Board Member Bebing Dumadag ug Provincial Veterinarian Dr. Benjamin Resma, kinsa mapasalamaton sa haluag nga kasing-kasing sa amahan sa lalawigan sa pagsuporta sa mga lakang batok sa pag-atake sa African Swine Fever (ASF) virus. Ug, aron na usab mapanalipdan ang industriya sa pagbuhi ug pagpadaghan sa binuhing baboy ug konsumedor sa karneng baboy.

Bisan si P/Col. Bahian nagpaabot sa iyang pagpasalamat ngadto kang Gobernador Emano sa walay hunong nga pagpaluyo sa mga kalihukan sa kapulisan alang sa mas epektibo nga pagpatunhay sa kahusay ug kalinaw sa lalawigan sa Misamis Oriental.

“Ang ginahatag sa atua sa atong Gobernador, both material and financial support, para sa atong kapulisan sa tibuok Misamis Oriental. Last week nakahatag siya og surveillance camera ug financial support sa mga kapulisan hilabina sa check points. Daghan kaayong salamat Gov. sa imong supporta ug tabang sa pag serbisyo sa atong katawhan sa Misamis Oriental Province,” niya pa.

Sa tanang lakang sa pagpatunhay sa kahusay ug kalinaw dinhi sa Misamis Oriental, wala sukad magpasagad ang pamunuan ni Gobernador Bambi Emano sa tanang yangongo sa kapulisan, hilabina nagtuo ang gobernador nga samtang kita nagsandig sa atong seguridad ngadto kanila, aduna usab kitay responsibilidad sa pagpaluyo sa ilang mga paningkamot.