NAGPAHATOD sa iyang dakong pasalamat ug pagdayeg si Regional Manager sa Philippine Coconut Authority- Davao Research Center (PCA-DRC) Dr. Liberty Canja ngadto kang Gov. Bambi Emano tungod sa padayon nga pagpromotar niini sa industriya sa lubi ug sa pagdasig niini sa daghan pa nga mga mag-uuma sa pag venture sa coconut farming.
Lakip sa iyang gipasalamatan ang suporta ug mga lakang sa Provincial Agriculture Office sa pagpanguna ni Jose Apollo Pacamalan.
Nakahatag na sa dili muobos sa 30,000 ka mga coconut seedlings ug seed nuts sa klase-klase nga mga variety sa coconut tree ang PCA-DRC Region XI dinhi sa probinsya sa Misamis Oriental.
Ang mga planting materials nga gihatag mao ang seedlings sa Tacunan Tall ug Sweet Aromatic Dwarf nga mga variety sa coconut tree.
Ang maong mga seedlings gamiton sa itukod nga demo farm ug nursery facility alang sa rehabilitation process sa coconut industry sa probinsya.
Sa kinatibuk-an moabot ngadto sa 100, 000 ka seedlings ang gihangyo sa probinsya ug hinay-hinay na kining nahatag sa PCA.
Tungod sa personal nga hangyo ni Governor Bambi nahimong posible ang pagsuporta sa PCA-DRC Region XI dinhi sa lalawigan.
Dungan sab niini misuhestiyon si Governor Bambi nga pahimuslan ang tanang produktong mahimo gikan sa tanom nga lubi arun mas mapakusgan pa ang industriya sa pag-uma sa lubi sa probinsya.
Sa parte ni PAGRO Head Apollo Pacamalan iyang gipaabot nga buot gyud buhion ni Gov. Bambi ang industriya sa lubi sa probinsya arun sa pagpakusog sa panginabuhian sa mga coconut farmers ug arun makadugang usab sa paglambo sa ekonomiya sa probinsya.
Lakip niini ang mga lakang nga pagproseso sa tubig sa sweet aromatic variant sa lubi nga mahimong ilimnon nga pwedeng pagka-kitaan sa probinsya pinaagi sa pagtukod og processing plant.
Gipaabot sab ni Governor Bambi iyang dako nga pasalamat sa mga nagdumala sa PCA-DRC hilabina nga ang lalawigan sa Misamis Oriental naila sa Kuyamis o abunda sa tam-is nga bunga sa lubi.