NAGPADAYAG si Governor Bambi Emano sa iyang kadasig nga matutokan ang pagpabaskog balik sa ekonomiya sa Misamis Oriental taliwala paman sa padayon nga pakigbisog sa Corona Virus Disease (Covid-19).

Atol sa virtual flag raising ceremony adlawng Lunes, Agosto 17, 2020, gibutyag ni Governor Bambi nga usa sa iyang prayoridad karon nga mahuman ang tanang proyektong imprastraktura sa Misamis Oriental aron mahibalik ang ekonomiya nga labihan ka apektado ug usa niini ang mga pinakadakong kontributor sa panginabuhian sa mga Misamisnon nga mao ang Turismo.

Mando karon sa amahan sa lalawigan nga paspasan paghuman ang mga nagka lain-laing proyektong imprastraktura apan kinahanglan gihapon nga magsunod sa hustong mga lakang aron malikayan ang makapatay nga virus.

Taliwala sa pagsirado sa daghang mga negosyo tungod sa Covid-19, kampante si Governor Bambi nga pinaagi sa pagtinabanga sa tanan, mas dali ug sayon nga makab-ot ang kabaskog sa ekonomiya nga gikinahanglan karon sa lalawigan sa Misamis Oriental.