ANG buhatan sa Provincial Agriculture Office sa Misamis Oriental aktibo og agresibo gihapon sa pagpangtunol sa ayudang panginabuhian sa mag-uuma sa entero probinsiya bisan taliwala sa hulga sa pagtakboy sa coronavirus disease 2019.
Sugod sa bulan sa Pebrero 2020, mikabat na sa 10,960 packs sa pinakbet vegetable seeds; 32, 822 coconut seedlings; 500 bags nga upland rice; 50 bags sa hybrid corn; 1,500 bags sa OPV corn; 90 bags sa organic fertilizer; 100 solar sets; 100 sets sa fishing gears; 80,000 ka tilapia fingerlings; 96 sacks sa tilapia feeds; ug 13,000 ka hito fingerlings, ang suma total nga gitunol sa PAGRO ngadto sa nagkadaiyang organisasyon sa mag-uuma ug mangingisda sa lalawigan.
Kini, human hugot gayud nga gimando ni Gov. Bambi Emano ngadto kang PAGRO head Mr. Jose Apollo Pacamalan nga atimanon ug dili pasagdan ang sektor sa agrikultura sa probinsiya aron masiguro nga dunay makaon ang katawhan ning panahon sa krisis nga resulta sa pandemya.