SUBAY sa mandato ni Governor Bambi Emano nga kanunay abagan ang sektor sa Agrikultura sa Misamis Oriental, ang buhatan sa Provincial Agriculture Office (PAGRO) nagpadayun ug mas gihingusgan pa ang pagpang-apod sa mga kagamitan ug mga binhi ngadto sa mga mag-uuma sa Misamis Oriental.
Niadtong Hulyo 23, 2020 gidawat ni Mr. Patrocino Akut sa ngalan ni Kapitan Nelson Acusar sa Sinai, Laguindingan ang 24 ka pakete sa nagkalain-laing klase sa mga binhi sa gulay sa buhatan mismo sa PAGRO.
Ang maong mga binhi ipang apud-apud ni Kapitan Acusar sa iyang mga residente aron itanom karon panahon sa ting-ulan.
Samtang gidawat sab ni Kapitan Edwin Casiño sa Hinaplanan, lungsod sa Claveria ang 11 ka sako sa organic fertilizer, 1 ka knapsack sprayer, 1 ka kilo nga binhi sa sweetcorn, 1 ka karton sa foliar fertilizer, ug isa ka botelya nga pesticide.
Ang maong mga gamit ug mga binhi sa sweetcorn ipang apod gihapon ni Kapitan Casiño sa mga mag’uuma sa Hinaplanan isip dugang abag sa ilang pananom.
Matud ni Mr. Benjamin Boston, Jr., Provincial Agricultural Technologist sa PAGRO nga dili lamang mga mag-uuma ang ilang gatabangan ug gatagaan ug binhi, apan lakip ang mga adunay interes nga mag-backyard farming o kadtong gusto mananom diha sa ilang mga panimalay.
Kinahanglan lamang na magpahibalo sa buhatan sa PAGRO o sa mga lokal nga opisyal.
Taliwala paman sa pandemya nga gipakigbatokan karon sa kagamhanang lokal sa Misamis Oriental ubos ni Governor Bambi, ang buhatan sa PAGRO sa pamunuan ni Mr. Jose Apollo Pacamalan ang wala sab puas sa ilang pagpa-abot og tabang sa mga nanginahanglan labina sa sektor sa Agrikultura.