NAG-DRY run na ang inter-agency ning bag-o sa proseso kon unsaon pagpadala pagbalik ngadto sa South Korea ang basura nga anaa karon sa Phividec compound sa Tagoloan. Ang proseso diay isulod sa tanner bag ang basura una pa kini isulod sa container van nga maoy ikarga sa barko padulong pabalik sa iyang ginikanan.

Matud pa ni Board Member Gerardo “Boboy” Sabal wala pay shipment nga naka-schedule kung kanus-a ikarga ang basura nga nakasulod na sa tanner bag, ug wala pa mahibal-i kung kanus-a gayud modunggo ang barko dinhi sa Misamis Oriental aron sa paghakot sa nasangpit nga basura nga gipasulod sa Verde Soko sa Phividec compound pinaagi sa pribadong pantalan sa lungsod sa Villanueva usa ka tuig na ang milabay.

Ang inter-agency naglangkob sa Bureau of Customs, Department of Environment and Natural Resources, Provincial Government ug Municipal Government sa Tagoloan. Atol sa dry-run, daw mao ra’g gihilasan si Board Member Sabal kang Tagoloan Mayor Enan Sabio sa iyang panawagan nga unta motabang ang pangagamhanang lokal sa Misamis Oriental, partikular si Gobernador Bambi Emano, alang sa pagpabalik sa basura ngadto sa South Korea.

Sulti ni Board Member Sabal, wala pa matawo sa munisipyo sa Tagoloan si Sabio, nagpabalik na og basura ang inter-agency ngadto sa South Korea alang sa first batch niadtong Disyembre 2018. Dugang sa magbabalaud, dili na kinahanglan ni Sabio nga manawagan tungod kay dili pa siya mayor, duna nay lakang si Gobernador Emano kalabot niini.

“Karon, kay hapit na masulbad ang problema sa basura, mosulod na dayon sila (Sabio) sa eksena. Karon pa sila manunga kay duol na masulbad, duol na mahuman? Wala pa may barko intawon…unsa man diay among gibuhat. Dry-run pa man to, wala pay barko. Let’s say October 15 moabot ang barko gikan sa South Korea, hinay-hinayan dayon pagkarga,” tataw ni Board Member Sabal.

Kahinumduman nga si Board Member Sabal ang mihimo sa exposè mahitungod sa misulod nga basura dinhi sa Misamis Oriental niadtong milabay nga tuig pinaagi sa iyang privilege speech sa Sangguniang Panlalawigan, nunot na usab sa hangyo ni Gobernador Bambi Emano nga imbestigahan gayud kini tungod kay dili gusto sa gobernador nga himuong basurahan ang lalawigan. Hangyo ni Board Member Sabal ngadto kang Sabio, magtug-an unta siya sa tinuod ug dili limdan ug bakakan ang katawhan.