KABAHIN gihapon sa tinguha ni Governor Bambi Emano nga pagpasaka sa food sufficiency ug food security alang sa katawhan sa Misamis Oriental labina nilang mga mag-uuma ug mangingisda.
Usa sa mga proyekto sa buhatan sa Provincial Agriculture Office (PAGRO) ubos sa Fisheries Division sa pagpanguna ni Ms. Kim Magdugo alang sa mga mangingisda mao kining Fish Aggregating Device o Payaw project nga nagkantidad sa P582, 600 kon hain adunay 10 ka mga benepisyaryo sa Asosasyon gikan sa lain-laing lungsod sa lalawigan.
Ang mga benepisyaryo nakadawat sa mga materyales sa paghimo sa Fish Aggregating Device sama sa Polypropylene ug Polyethylene Ropes, Styrofoam, mga sako sa semento, tire ream, ug mga used tires.

Ang maong device gidesinyo arun maoy aponganan sa mga isda kon hain gibutang kini sa ilang rota o agianan aron ang mga mangingisda pwede na sila didto magkuha og mga binulto sa mga klase-klase sa isda sulod sa ‘municipal waters’ sa lalawigan sama sa kutob, tamban ug uban pang mga isda nga makuha sa lawod. Dako kini nga bentaha aron mas mapadako ang kita ug mas mapadali usab ang ilang pagpanagat.

Gani, niadtong Oktubre 2, 2020 ang Asosasyon nga mao ang P3 Poblacion Fisherfolks Association sa Punta Silum, Manticao ang gibisitahan sa PAGRO Fisheries Division arun kumustahon ang mga miyembro sa asosasyon.
Dako kaayo ang pagpasalamat ni Association President Erwin N. Paradero tungod kay ang ilang payaw, wala lamang nagamit sa ilang mga miyembro apan nakagamit sab ang laing mga asosasyon ug mangingisda sa Manticao lakip silingan nga mga lungsod.

Ang Payaw Project sa PAGRO gimugna aron maminosan ang kalisod labina sa mga mangingisda kay tumong sa kagamhanan ni Governor Bambi nga mahatag ang seguridad sa pagkaon lakip paghatag og alternatibong panginabuhian sa mga mangingisda nga mapatas-an ang ilang kinitaan.