Nagpahigayon ang buhatan sa Provincial Disaster Risk Reduction Management kon PDRRMO ug Earthquake Drills and Emergency Preparedness Orientations ngadto sa mga nagkadaiyang eskwelahan ug kompanya.

Tungod sa maayong dungog nga naangkon sa PDRRMO, personal nga gihangyo ang ilang buhatan nga magpahigayon ug Earthquake Preparedness Orientation ug Earthquake Drill sa planta mismo sa kompanyang San Miguel Beer Incorporated niadtong Hunyo 7, 2019nga nahimutang sa Brgy. Sta. Ana, lungsod sa Tagoloan.

Mikabat ngadto sa dos sientos (200) ka mga empleyado ang ilang gi-gayahan sa mga saktong pamaagi kung adunay hulga sa linog. Ngani, adtong milabay nga semana, Hunyo 4 ning tuig, ang ilang buhatan mibisita usab sa Tagoanao Elementary School sa dakbayan sa Cagayan de Oro para sa usa ka earthquake and first aid orientation sa mga magtutungha apil na usab sa mga magtutudlo.

Matud ni Mr. Roi Vincent Eli, ang Local Disaster Risk Reduction Management Assistant nga mandato gayud sa ilang opisina ang pagpa-abot ug mga orientations and drills sa nagkadaiyang tunghaan ug kompanya. Dugang pa niini, andam kanunay ang ilang buhatan kung nagkinahanglan sa ilang serbisyo, sa probinsya man sa Misamis Oriental o dakbayan sa Cagayan de Oro.

Ang Provincial Risk Reduction Management Office dakung kaabag ni Gov. Bambi Emano sa iyang programang kahusay ug kalinaw, hugot gayud nga mandato sa Gobernador ang kaluwasan sa tanan hilabina panahon sa katalagman.