NAG-RESULTA na gayud ang hago ug paningkamot sa Public Employment Services Office (PESO) sa Misamis Oriental. Dili gayud diay malimtan ug talikdan ang maayong buhat hilabina kon kini nakahatag benepisyo sa katawhang kabus.
Gipasidunggan, gidayeg ug giila sa Department of Labor and Employment DOLE Regional Office 10 ang PESO office sa Misamis Oriental pinaagi ni Gobernador Yevgeny Vincente “Bambi” Emano ug PESO Manager Zorobabel W. Rabe niadtong Enero 16, 2019, didto sa Chali Beach Resort, Cugman, Cagayan de Oro City, atol sa Year end Assessment and Awarding Ceremony, kung diin nagkatapok ang tanang PESO Managers sa tibook Northern Mindanao.
Hugot nga direktiba ni Gobernador Bambi ngadto kang Ms. Rabe nga himuon ang tanan aron makatabang pagsulbad sa gikinahanglang trabaho ug kapangitaan sa matag Misamisnon.
Tuod man, matag karon ug unya, nagpahigayon sa jobs fair ang buhatan sa PESO alang sa paghatag oportunidad sa kabatan-onan ug mga hamtong nga makaangkon ug trabaho, sulod man o gawas sa Misamis Oriental ug gawas sa nasud.