MOKABAT sa 60 ka kabaw ang nakatakdang i-apod apod sa lokal nga pangagamhanan sa Misamis Oriental ngadto sa nagkadaiyang organisasyon, asosasyon, kooperatiba ug indibidwal nga mag-uuma, sa dili madugay.

Kini, human ang Philippine Center for Carabao, pinaagi ni Senator Cynthia Villar, magtunol sa 60 ka kabaw pinaagi kang Gobernador Bambi Emano, aron sa laing paagi makatabang sa mga nagkinahanglan og kapangitaan.

Sa gihimong courtesy call ni Dr. Lowell Paraguas sa Central Mindanao University (CMU) sa Bukidnon, niadtong Hulyo 19, 2019, sa buhatan sa gobernador, maoy adlaw usab nga gipadangat niini ang maayong balita ngadto sa amahan sa lalawigan.

Matud ni Gobernador Bambi, dili pangdaru ang maong mga kabaw kon dili himuon kining tinubdan sa presko ug sustansiyadong gatas, “mas sustansiyado pa kompara sa gatas sa inahan.”

Samtang magdagan ang panahon, adunay higayon nga makatukod kita dinhi sa Misamis Oriental ug kaugalingong dairy facility, aron usab makahatag sa dugang oportunidad sa trabaho ug ekonomikanhong kalihukan.

Wala matago ni Gobernador Bambi Emano ang iyang dakung kalipay sa katuyoan ni Senator Cynthia Villar nga mohatag dugang oportunidad sa trabaho ug kapangitaan dinhi sa Misamis Oriental, hilabina nakapunting kini nga programa alang sa paghatag haruhay ug hayahay nga kahimtang sa atong kaigsuonang kabus sa lalawigan ug dakbayan sa Cagayan de Oro.