Gisugdan na sa provincial police office sa Misamis Oriental ang simultaneous PNP checkpoint sa duha ka distrito sa lalawigan aron pagsiguro nga way makasulod nga tawo nga dunay simtomas sa sakit nga corona virus.

Kagahapon Marso 20 ning tuig kasamtangan, giimplementar ang maong checkpoint human magkasabot ang tanang Mayor sakop sa 23 ka municipyo ug duha ka dakbayan nga istrikto nila kining ipatuman pinaagi sa tabang sa kapulisan.

Ang Alliance batok COVID-19 gilangkuban sa mga municipal health office, municipal disaster risk reduction and management office, barangay health workers ug lokal nga kapulisan kinsa mihimo ug checkpoint sa matag boundary gikan sa Lugait alang sa weste nga bahin, Jasaan para sa central district paingon na sa Magsaysay alang usab sa este nga bahin niini sa lalawigan.

Parahon sa maong grupo ang tanang pribado ug pampublikong sakyanan aron kuhaan sa ilang temperatura pinaagi sa thermal scanner gawas nga kinahanglang muagi sa foot bath sa dili pa kini hingpit nga pabyaheon.

Papilitan sab nila ug mga road pass/stickers ang mga sakyanan diin nakasuwat ang point of origin niini ug point of destination aron dili na sitahon pa sa musunod nga mga lugar nga ilang maagian ug dili sila malangan.

Matud sa hepe sa provincial police office Coronel Robert Roy Bahian buhaton nila kini baynte kwatro oras hangtud nga hingpit ug mawala ang hulga sa corona virus disease nga nakaapekto lukop nasud. Kini gihimu aron lang masiguro ang kaluwasan sa publiko.

Gipasabot sa mga MDRRM officers sa aning mga kalungsuran nga kadtong tawo nga dunay body temperature nga labaw pa sa 37.5 temporaryo nilang ihold aron makuhaan ug detalye subay sa lagda sa department of health. Kinahanglan kining mupaubos sa self quarantine o ba kaha mamahimong isakay sa ambulance ug iderecho sa labing duol nga hospital.

Subay niini hugot nga gimando ni Gobernador Bambi Emano sa kapulisan sa probinsya nga isktriktong ipatuman ang hugot nga checkpoints sa lungsod sa Lugait ug Magsaysay labi pa kay kini ang mga entry points sa Misamis Oriental.

Tinguha sa gobernador nga kapugngan ang pagsulod sa COVID sa dakbayan sa Cagayan ug lalawigan alang sa kaluwasan sa tanan.