Dako ang pasalamat ni Kapitan Celestino Cena sa Brgy. Panabol, Kinoguitan tungod kay pormal nang magamit ang Calubo-Napusilan-Kidampas Provincial Road sa nasangpit nga lungsod.
Niini mas niulbo ang pasalamat sa tanang lumupyo sa lugar ngadto kay Gobernador Bambi Emano nga pamaagi niining dalana nga mokabat sa 0.88 km kon 880 metros nga gitas-on, mamahimo nang mas dali ang pagpadala sa mga abot sa mag-uuma ngadto sa sentrong bahin.
Gani ingon pa sa Gobernador nga dili lamang haruhay nga kahimtang sa kinabag-an ang tuyo ug tumong sa pagpatuman sa mga proyektong kadalanan sa kabukiran ug kadaplinan dinhi sa Misamis Oriental, apan tukma usab sa panlantaw ni Presidente Rodrigo Duterte mao ang pagkab-ot sa hingpit nga kahusay ug kalinaw sa matag lungsod ug dakbayan nga moresulta sa kalamboan nga maangkon sa katawhan.