WALAY pa gihapon mihunong ang nagkadaiyang grupo ug organisasyon sa Misamis Oriental sa pagtunol sa ilang hinabang ngadto sa atong frontliners sa balay tambalanan ug checkpoints. Gani, dili pa gihapon ulahi ang gitunol sa Salay Mountaineering Team nga upat ka portable hand washing facility pinaagi sa pangagamhanan sa probinsiya.
Si Niño Marve Abejuela, ang President sa Salay Mountaineering Team, nanghinaot nga kaning gamay nga tabang gikan kanila makatabang na ug dako sa mga frontliners nga padayon nakigbatok sa makamatay nga sakit nga coronavirus disease 2019. Malipayon uyamot si Mr. Abejuela tungod kay gikalipay ni Gov. Bambi Emano ang ilang kontribusyon sa pakigbatok nga dili mokuyanap ang gikalisangang sakit.
Sa iyang bahin, sulti pa ni SK Federated President ug ex-officio Board Member Kerwin Jess Soldevilla, kini nga donasyon usa sa pamaagi sa pagpakita sa suporta ug pasalamat kang Gov. Emano sa iyang seryoso ug walay kukahadlok sa tanang desisyon aron mamahimong luwas ang katawhan sa Misamis Oriental sa tanang kalamidad lakip na ang COVID-19.