SUSAMA kang Gobernador Bambi Emano, nanawagan usab si Special Assistant to the President (SAP) Christopher “Bong” Go ngadto sa publiko sa paglikay sa pagpagawas ug sayop ug dili maayo nga impormasyon, nga maoy hinungdan sa pagkapapag sa katawhan nga mo-resulta sa pagkahugno sa nasud.
Giluwatan ni SAP Bong Go ang iyang panawagan ug hangyo, hilabina hangtud karon, daghan pagpangdaut ug pagpang-sabotahe sa mga programa ni Pres. Rodrigo Duterte pinaagi sa social media ug uban pang internet sites.
Aron nga mapalapdan ug mapakatap pa ni SAP Bong Go ang iyang panawagan ug mga programa ni Pres. Duterte pagbatok sa paghitak sa ginadiling droga ug korapsiyon, nag-organisa kini ug caravan sa tanang municipal coordinators sa SAP Bong Go Movement karong adlawa, Setyembre 13.
Sa weste nga bahin sa lalawigan sa Misamis Oriental, gikan sa lungsod sa Lugait padulong sa dakbayan sa Cagayan de Oro; ug Magsaysay sa este nga bahin, padulong sa dakbayan sa Cagayan de Oro, magtapok ang maong mga coordinators aron sa pagpalanog sa panawagan ug hangyo sa Special Assistant to the President.
Sa Misamis Oriental Integrated Sports Complex (MOISC) na dayon magtapok ang caravan alang sa hamubo nga programa.
Si SAP Bong Go, isip tuong kamot ni Pres. Duterte, maoy mopalanog sa tingog ni Digong, hilabina sakit kaniya nga matag karon ug unya, adunay nataho nga nakabsan sa kinabuhi tungod sa iyang hugot nga kampanya batok sa ginadiling droga ug pagpangawkaw sa kwarta sa kaban sa katawhan.
Kung pangutan-on kon duna bay plano nga molansad pagka-Senador si SAP Bong Go, matud niini, wala kini plano. Apan, dili lamang niya siradhan ang iyang pultahan sa kahigayonan kon ugaling itugot kini ni Presidente Duterte.