PADAYON sa pagpaningkamot nga makaserbisyo ang buhatan sa Misamis Oriental Provincial Jail (MOPJ) taliwala paman nga gipugngan ang pagpagawas og pundo gumikan sa gipakanaog sa korte nga Temporary Restraining Order (TRO) sulod sa 20 ka adlaw. Nagpaabot sa iyang dakong kabalaka si MOPJ Jail Warden Dominador Tagarda gumikan walay mahitabong disbursement sa pundo sa maong pasilidad karon nga gipugngan sa korte ang implementasyon sa 2020 Annual Budget. Gikagoul ni Tagarda kay kutob nalang karon semanaha ang budget alang sa ikapakaon sa mga piniriso. “Dako ni siya nga hulga no ang hisgutanan sa TRO tungod kay sa diha nga gipangutana atong Marketing Officer pinaagi ni PG3 Paul Santos ang kwarta nga nabilin sa iyang cash advance taman ra gyud karong semanaha, so dunay dakong hulga sa kasamok kay ang mga binilango, once gani nga walay pamahaw, paniudto, panihapon, ang mahitabo ana gubot gyud so mangkalampag na sila,” matud ni Tagarda ug dako ang panghinaot nga ang gipasaka nga motion for reconsideration ngadto sa sala ni Judge Maritess Bernales ang ma-resolba unta sa labing daling panahon. “Nanghinaot kita aron dili makatagamtam sa kasamok, kagubot ning atong prisohan kay dako ni siya kaayo nga magsagang ka ba sa kining problema sa piniriso tungod kay naay TRO nga nagpugong sa pagpakaon nila.” pahayag ni Tagarda. Gipa-ambit sab niini nga walay nahitabong drama sa sitwasyon nga giatubang karon sa Probinsya. “Dili mahitabo ang drama-drama niini kay nia ta sa kasing-kasing sa siyudad gibutang, unya dili nato ignon nga dramahon nato ang katawhan nga nagapaminaw, nagatan-aw sa sitwasyon nato diri so tataw makita jud na nila nga ang iya sa piniriso, kung dili mahatag, dako gyud nang kagubot.” Pagtataw niini Nagaapaabot si Warden Tagarda sa abiso gikan sa Provincial Attorney’s Office sa mga adunay “scheduled hearings” nga padayun gidungog sa korte ug ilang mahimo mao ang mangita na lamang og kaugalingong pamaagi aron mahatud sa korte.