Marso, 17, 2020, gisugdan na ang skeletal workforce scheduling sa mga kawani sa kapitolyo probinsyal sa Misamis Oriental. Kini, alang kang Gobernador Bambi Emano, aron ma-menus menusan ang pagpunsisok sa mga empleyado, isip lakang sa paglikay sa posibleng pagtakboy sa coronavirus disease (COVID-19).

Pinaagi sa Memorandum Order JLM No. 2020-463, gimanduan ang tanang ulo sa departamento sa pagpatuman sa special work arrangement kon pagbahin sa mga empleyado nga motungha sa adlaw’ng Lunes, Miyerkoles, ug Biernes, samtang ang uban sa Martes ug Huebes, aron sa gihapon magpabiling normal ang trabaho sa kapitolyo ug pag-atiman sa mga kliyente niini matag adlaw.

Apan, lakip sa maong kamanduan nga magpabiling in-door kon magpuyo sulod sa balay ang mga empleyado nga wala maka-schedule nga motungha sa trabaho.

Samtang ang frontline offices sa kapitolyo sama sa Provincial Disaster Risk Reduction Management Office (PDRRMO), MisOrCareS, Provincial Health Office (PHO), Provincial Jail, PSWD-Balay Kaugmaon, ug kwarentinas sa Lugait ug Magsaysay magpabilin sa ilang normal duty schedule.