SA gikatakdang pagbukas sa klase sa matag eskwelahan alang sa tuig 2020-2021, gikinahanglan ang hapsay nga pagplano sa Learning Delivery Modality sa Department of Education (DepEd) inubanan sa matag lokal nga kagamhanan aron sa pagsiguro nga mahimong luwas ang mga magtutungha sa Corona Virus Disease (Covid-19).
Gumikan niini lakip sa gihisgutan atol sa ika lima nga Local School Board Executive meeting nga gipanguluhan ni Governor Bambi Emano uban sa mga kauban sa komitiba, mao ang pag-aprobar sa sugyot sa Principal sa Misamis Oriental General Comphrehensive High School (MOGCHS) nga mao si Dr. Pedro R. Estaño nga hatagan og 32 GB On the Go USB (OTG-USB) ang 10,000 ka mga estudyante ug duha ka unit sa RISO Machine alang sa ilang online ug offline learning.
Kini nga mga sugyot hangyo giaprobahan na sa LSB.
Matud ni Dr. Estaño nga gikinahanglan nila ang duha ka mga RISO unit alang sa pag-print sa mga learning modules ug ang OTG USB alang sa digital modules.
Ang pag-gamit sa OTG USB mahimo pinaagi sa pagbutang sa mga learning videos sa tanan leksyon kung asa ang magtutudlo magpahigayon sa demonstration sa mga leksyon nga mamahimong makita, ma-dunggan ug matun-an sa mga estudyante sulod sa ilang panimalay bisan walay internet connection kay kini ma-konekta sa gadget sama sa cellphone (Android) ug telibisyon nga dunay USB port.
Kini suportado ni DepEd Misamis Oriental Schools Division Superintendent Dr. Jonathan Dela Peña kay matud niini nga ang MOGCHS nahimutang sa lugar nga high risk nga dili mahimo niini ang face to face learning.
Gikinahanglan sa nasangpit nga tunghaan ang matag-kagamitan sa pag-siguro nga magpadayun ang pagtuon sa mga bata bisan paman sa giatubang sa tibuok kalibutan nga pandemya hatod sa Covid-19.
Suportado ni Governor Bambi Emano ang mga lakang sa DepEd Misamis Oriental alang sa pagpadayun sa klase kay dili mahimong maulahi ang mga tunghaan sa lalawigan sa pagsagop sa new normal kay alang kini sa kaayuhan ug kaugmaon sa kabatan-onan.