Laing batch na usab ang malampusong mi gradwar sa gipahigayon nga Summer Class sa buhatan sa Provincial Library niadtong Mayo 31, 2019.

Mikabat ngadto sa 33 ka mga bulilit ang edad 3 anyos hangtud 5 anyos ang mi gradwar niadtong gipahigayon nga Culminating Ceremony sa hawanan sa Kapitolyo Probinsyal.
Mao kini ang ika-31 nga Culminating Activity sa Misamis Oriental Provincial Library nga gisugdan niadtong tuig 1988. Mudagan sa usa ka bulan ang maong summer class nga nagsugod Abril 23 ug nahuman niadtong Mayo 23 ning tuig.
Gisugdan kini sa usa ka balaanong misa nga gipangulohan ni Rev. Fr. Coke Daryl Esprieto, SSJV. Kauban ang ilang mga ginikanan, nisaka ang mga bulilit sa intablado aron modawat sa ilang certificate nga adunay pirma mismo sa amahan sa lalawigan, Gob. Bambi Emano.

Gawas sa certificate nga nadawat sa mga bulilit, nakadawat usab sila ug medals, ribbons, ug school supplies gikan sa pangagamhanang lokal sa Misamis Oriental.

Nakigduyog sa maong kalihukan si Board Member Nancy Madjos nga naghatag ug maundanong mensahe isip representante ni Gov. Bambi Emano.
Anaa usab ang Misamis Oriental Department Heads Association nga gipangulohan ni Assistant Provincial Administrator Ms. Carol Lim-Caidic.

Kahinumdoman nga niadtong niaging tuig, ang summer class sa Provincial Library exclusive lamang sa mga anak o apo sa mga empleyado sa Kapitolyo Probinsyal apan karong tuiga, open-to-all kini.

Ang maong Summer Class Program hugot nga gisuportahan ni Gob. Bambi Emano tungod kay siya nagatuo nga ang mga kabataan karon ang paglaom ug ang sumusunod nga mamahimong lideres ugma damlag ug kinahanglan nga mintras bata pa makakat-on na sila sa sakto nga pagtulun-an ug hustong edukasyon. Ang edukasyon usab ang ika-upat sa walo ka haligi nga nagtuko sa flagship program ni Gob. Bambi Emano.