GUMIKAN sa pagpagawas sa Temporary Restraining Order (TRO) sa korte pagdili sa pagamit budget ning tuig sa kapitulyo probinsyal usa sa mga labing naapektuhan ang mga programa sa buhatan sa Provincial Agriculture Office (PAGRO).
Ang ulo sa buhatan nga mao si Mr. Jose Apollo Pacamalan, nasubo og maayo sa temporaryong pagpaundang sa mga programa sa PAGRO nga maoy gisaligan unta sa daghan nga mga Misamisnon nga labing naglisod karon untang panahuna gumikan sa krisis sa panglawas.
Si Governor Bambi Emano nagbutyag na sa iyang labihan nga kabalaka sa sitwasyon nga anaa sila karon taliwala sa pagpanghatag suporta sa mga maguuma sama sa gulay, humay, itik, manok, ug baboy.
Lakip sa ilang programa isip suporta sa mga mag-uuma mao ang bahog sa mga binuhing tilapya ug bangus nga sa pagkakaron gagmay pa kaayo.
Gibutyag sab ni Gov. Bambi nga mahunong usab ang kalihukan nga adunay kalabutan sa pagpurga ug pagpabakuna sa mga mananap nga iyang gikahadlukan nga magresulta sa pagsaka sa ihap sa mga mananap nga magsakit.
Taliwala sa giatubang nga pagsuway karon sa kapitolyo probinsyal, nagpa-abot sa iyang mensahe si Mr. Jose Apollo Pacamalan nga sa mga umaabot nga adlaw nga sakop sa TRO, iyang gihangyo ang mga mag-uuma ug mga Misamisnon nga teknikal nga suporta lamang usa ang mahatag sa PAGRO.
Gisugyot sab niini nga samtang dili pa sila makalihok tungod sa TRO sa mga Municipal Agriculture Office lamang usa mangayo ug suporta ang mga mag-uuma.