NAGLABAD intawon ang ulo sa mga magbabalaud sa Misamis Oriental kon unsaon nila nga mapasa na gayud ngadto sa Department of Budget Management (DBM) ang 2020 budget ordinance sa lalawigan. Kini, tungod kay ang mga supporting documents sa nasangpit nga ordinansa dili ipagawas sa bise gobernador sa dili masabtan nga rason.

Sa ilang pakisusi, matud ni Board Member Wayne Militante, wala mawala ang mga supporting documents, apan wala lamang gayud plano ang bise gobernador nga iuli kini aron ma-review na sa DBM ug dayon mapatuman na ang programa’g proyekto sa lalawigan sa mas dali nga panahon.

Ang supporting documents naglangkob sa AIP kon Annual Investment Plan, GAD kon Gender and Development, Budget for Nutrition Program, Peace and Order ug uban pa.

Gitataw pa ni Board Member Militante nga wala man unta bisan isa na lang ka Board Member ang misupak sa pagpasar sa 2020 budget ordinance niadtong Disyembre 2019, apan sa takulahaw lamang mibalibad naman og pirma ang bise gobernador ug iyang duha ka kaubang Board Member.

Tungod kay supak sa pag-suporta ang bise gobernador sa hingpit nga pagpatuman sa budget ordinance, gikabalak-an karon ni Gobernador Bambi Emano basin masuko ug magmahay ang mga tawo ngadto sa bise gobernador, hilabina kabus nga naghulat sa libreng tambal, libreng hospitalisasyon, libreng edukasyon, libreng binhi, libreng patubo, libreng technical training; pag-semento sa dalan sa kabukiran, pagtukod sa covered court, pagtukod sa health center, pagtukod sa water system, ug daghan pang uban, dili na hinuon pamatuman kay wala maaprubahan ang budget alang ning tuig 2020.