Laumang sa dili madugay mahatagan na sa igong solusyon ang komunista ug armadong pakigbisog sa kabukiran batok sa gobyerno dinhi sa Misamis Oriental. Kini, human gilusad ang Misamis Oriental Task Force to End Local Communist Armed Conflict (MOFT-ELCAC) niadtong Huwebes, Setyembre 26, 2019, sa Brgy. Eureka dakbayan sa Gingoog.

Didto mitambong mismo si Gobernador Bambi Emano, ug kanhi Kongresista sa Unang distrito ug karon bise mayor sa Gingoog Peter M. Unabia duyog ni Eureka Brgy. Captain Porferio Y. Doque III alang sa opisyal nga paglusad sa nasangpit nga task force, ang grupo nga maoy mangulo sa pagpangita’g paagi nga masulbad o maundang na ang komunista ug armadong kalihukan.

Bisan pa sa gilay-on sa Brgy. Eureka, wala magduhaduha og tambong ang gobernador sa nasangpit nga okasyon, aron personal nga mopadangat sa iyang pahalipay ug panawagan nga undangon na gayud sa hingpit ang kontra-gobyernong pakigbisog sa atong mga kaigsuonang rebelde, hilabina apektado kanunay ang sitwasyon sa kahusay ug kalinaw sa lalawigan nga maoy hinungdan sa nag-aginod nga kalamboan.

Matud ni Kapitan Doque, saludo kini kang Gobernador Bambi tungod sa gipakita niini nga suporta sa ilang paningkamot nga mapadangat sa mas sayon nga paagi ang kalamboan sa ilang lugar ug mga kasikbit nga baryo. Si Kap. Doque ang nangulo sa katawhan sa lugar sa mainiton nga pag-abi abi sa amahan sa lalawigan ug iyang mga kauban. Nahimo pang emosyonal ang amahan sa Brgy. Eureka niadtong tungora.

Nagpasalamat usab si Gobernador Emano ngadto sa tanang nasudnong ahensiya lakip ang mga miyembro sa armadong kusog sa nasud ug kapulisan nga mihatag sa ilang oras alang sa maong kalihukan, sa katuyoan nga mahiusahan ang kusganong panawagan nga maundang na ang armadong kalihukan sa kabukiran. Ang Task Force ELCAC maoy resulta sa sunod-sunod nga panatagbo sa Provincial Peace and Order Council dinhi sa Misamis Oriental, kung diin dakung pabor si Gobernador Bambi Emano nga mapatuman kini sa mas dali nga panahon.

Gawas nga mapatunhay sa hingpit ang panagdait, pagsinabtanay ug maundang ang panagbingkil tali sa gobyerno ug komunistang grupo, tuyo usab sa pagkatukod sa Task Force ELCAC nga mahimong progresibo ang kabukirang dapit sa lalawigan—mopaspas ang pagpatuman sa mga proyekto nga maoy dalan ngadto sa kusog ug lig-on nga ekonomiya alang sa tanan.