ISIP Local School Board (LSB) chairman, giaprobahan ni Governor Bambi Emano, ang sugyot nga himoung miyembro ang Provincial Director sa TESDA-Misamis Oriental ug kabahin na sa Provincial Local School Board (LSB).
Kini aprobado sa uban pang miyembro atol sa bag-ohay lamang nga gipahigayon nga 5th Local School Board Meeting via zoom niadtong adlaw nga Miyerkules, Hulyo 22, 2020.
Matud ni Governor Bambi nga ang pakighiusa sa maong ahensya dako og tabang sa pagpalig-on sa ilang mga programa lakip paghatag og dekalidad ug teknikal nga pagbansay.
Ang pagsagop sa TESDA giuyonan nila ni Mr. Jerome Mundo kinsa maoy Secretary sa LSB; Board Member Gerardo “Boboy” Sabal kinsa chairman sa komitiba sa edukasyon og ang Schools Division Superintendent (DepEd- Misamis Oriental) nga si Dr. Jonathan Dela Peña.
Gipaabot ni LSB Secretary Jerome Mundo nga ang TESDA adunay nagkalain laing programa sama sa mga short courses nga gilangkoban sa welding, aircondition repair lakip national certification sa NCI-1 ug NC-2.
“Partnering with TESDA will be a great opportunity for the Misamisnons,” matud ni Mundo.
Sa iyang bahin ni Board Member Sabal uyon kini nga nahisakop ang TESDA sa LSB gumikan kay ang mga programa nga gi introdyus ug giimplementar karon sa ahensya ang gipraktis na.
“Considering that we are now implementing K-12 program of Department of Education and I believe TESDA will be a very good partner for the Local School Board,” sulti sab ni Sabal ug miingon nga giimplementar na ngani kini sa mga Senior High School.
Giuyonan sab ni Dr. Jonathan Dela Peña si Board Member Sabal tungod kay matud niini nga ang ahensya sa TESDA dako og kabahin sa basic education system.
“TESDA is an integral part of the basic education system although lahi sila nga office but our K-12 now includes technical education especially ang atong Senior High School curriculum, so we need the expertise of TESDA,” matud ni Dela Peña.
Si Governor Bambi niingon nga kung ang probinsya nakahimo pagdawat kanila, ang Misamis Oriental lamang maoy unang probinsya sa Rehiyon 10 nga naglakip karon sa TESDA isip usa ka miyembro ug kabahin sa LSB.