ARON mapadayon ang pagkab-ot sa kahusay ug kalinaw ug kausaban sa tibouk lalawigan sa Misamis Oriental lakip kasikbit nga lugar gimugna ang Retooled Community Support Program (RCSP) sa Department of Interior and Local Government (DILG) inubanan sa mga kaabag nga mga buhatan, organisasyon, National ug Local Government Units (LGU) ug labaw sa tanan ang komunidad.

Atol sa joint meeting, gibutyag ni Engr. Marisia Naybe ang OIC Provincial Director sa DILG-Misamis Oriental nga ang maong programa pagsunod subay sa kamanduan ni President Rodrigo Roa Duterte ubos sa Executive Order 70 nga naglayon sa pagpahunong sa local communist armed conflict pinaagi sa pagsuta sa mga isyu ug mga gikinahanglan nga lakang sa gobyerno alang kanila lakip niini ang paghatag sa mga batakang serbisyo alang sa katawhan.

Sa Misamis Oriental, adunay 37 ka mga target barangays nga ipahigayon ang RCSP,13 niini ang gikan sa siyudad sa Gingoog, 6 sa matag munisipyo sa Claveria ug Salay, 5 niini sa munisipyo sa Balingasag, 4 sa Lagonglong, 2 sa Sugbongcogon ug 1 sa Medina.

Kalabot sa schedule sa orientation sa matag munisipyo, Ang DILG sa Misamis Oriental magpahigayon niini sa lungsod sa Claveria sa Agusto 4-5, 2020; Salay sa Agusto 6-7, Gingoog ug Medina sa Agusto 11-12 ug Agusto 13-14 sa lungsod sa Balingasag, Sugbongcogon ug Lagonglong.

Dugang ni Engr. Naybe nga ang mga gabayan niini naglakip sa papel sa matag koponan nga mao ang Basic Service Delivery Team, Citizenship and Community Participation team ug ang Peace, Law Enforcement Support Team.

Kini nga mga koponan sa RCSP pagahimoon gikan sa level sa probinsya, lungsod ug munisipalidad kon diin gikinahanglan sab ang pag-subay sa mga gabayan alang sa malampuson nga implementasyon sa RCSP Program.