Bisan tuod dili kaalyado sa pulitika ni Gobernador Bambi Emano ang liderato sa lungsod sa Villanueva, walay duhaduha nga mitunol gihapon kini sa balor P4 milyones nga proyekto ngadto sa nasangpit nga lungsod.

Nagpamatuod nga walay pili sa bulok sa pulitika ang gobernador ug pinangga usab niini ang katawhan sa nasangpit nga lungsod.

Ang nasangpit nga proyekto mao ang State-Of-The-Art (SOTA) building sulod sa Kalingagan National High School sa Brgy. Imelda, Villanueva, kung diin ang mayor, kongresista ug kandidato pagka-gobernador, pulos kontra-pulitika ni Gobernador Bambi ug sa PaDayon Pilipino.

Gitunol ang maong pundo niadtong Enero 30, 2019, tungod sa pagtuo ni Gobernador Bambi nga dili lamang ang ubang lungsod ang nagkinahanglan niini, apan mas gikinahanglan kini sa lungsod sa Villanueva nga uhaw intawon sa tunhay nga serbisyo.

Dili mahubit sa pulong ang kalipay sa Villanueva human madawat ang nasangpit nga proyekto, kung diin maoy yabe aron ang ilang mga anak mamahimong hingpit nga ma-edukar tungod sa maong proyekto.

Aron mas masabtan og maayo, ang SOTA usa ka gambalay kung diin pagahimuon ang pagtuon alang sa technical ug vocational courses, susama sa cookery, electronics, pluming, ug uban pa, nga libre lamang makat-unan sa kabatan-onan ug kabataan.