GIPABUHAGAY ni Provincial Board Member Gerardo “Boboy” Sabal III ang iyahang kahigwaos sa tinapulan nga trabaho ni Sangguniang Panlalawigan Secretary Atty. Ernesto Sotto. Gilaliman baya ang abogado, Pebrero pa nga recording sa committee meeting, karon pang Agosto 20, 2019, nahimoan og report.

Dili halos matugkad ni Board Member Sabal kon ngano ingon ka langan manarbaho si Atty. Sotto, nga unta importante kaayo kadto nga records kabahin sa ilang imbestigasyon sa MORESCO II niadtong Pebrero 2019.

Gani, tungod kay walay insaktong records nga gipakita si Atty. Sotto, nag-resulta kini og kaguliyang sa matag miyembro sa Sanggunian niadtong Agosto 27, 2019.

“Wala diay closure sa maong records, Mr. Chairman. Kay ang gihimo sa 17th Sanggunian karon pa man nay dokumento nga giluwat na paglabang sa 18th Sanggunian. This has nothing personal against the SP Secretary, Atty. Sotto or against the Vice-Governor, but this is a matter we can help the Sanggunian,” sulti pa ni Board Sabal.

Ang epektibo nga pagpangalagad publiko sa matag piniling magbabalaud mag-depende sa tanang adunay katungdanan sa Sangguniang Panlalawigan. Apan kon isa kanila, hilabina ang sekretarya wala magtuman sa iyang katungdanan, dili lamang kini mag-resulta sa kaguliyang, apan huyang pa gayud nga serbisyo sa katawhan. Mao na lamang ang sugyot ni Board Member Sabal nga sa matag committee meeting ug hearing, kinahanglan gayud nga adunay proper recording and accountability.