USA ang Sitio Camansi sa Barangay Banglay, lungsod sa Lagonglong sa mga pipila ka lugar sa probinsya sa Misamis Oriental nga kulang pa sa insaktong pasilidad sa tubig.
Tungod niini, giplano sa Provincial Agriculture Office (AGRO) – Engineering Division ang pagmugna sa water system arun aduna nay maayo nga makuhaan og limpyo ug luwas nga tubig imnon ang mga residente nga sagad sakop sa tribu sa maong lugar.
Sa kasamtangan nagsalig pa lamang ang mga residente sa Sitio sa tubig gikan sa sapa aron gamit sa pag-inom ug uban pang pang adlaw-adlaw nga gamitan sa tubig.
Nasayran nga ang problema dili sa tanang panahon luwas makakuha sa tubig sa ilang source tungod kay gawas sa pangpangon kini, aduna pay dugang nga problema sa ilang seguridad.
Sumala ni Engr. Evy Carusos, ang head sa Engineering Division sa PAGRO nga aduna nay nahino nga plano ug napasa na Provincial Engineering Office aron maaprobahan.
Nasabtan sab ni Engr. Carusos ang urgency sa panginahanglon sa tubig human makita niya mismo sa iyang pagbisita ang kakulangon sa insaktong sistema sa tubig sa dapit.
Malaumon ang katawhan sa Sitio Kamansi nga mahatagan ug prayoridad ang paspas nga pagkatukod sa maong water facility aron aduna nay dali ug luwas nga makuhaan sa tubig sa ilang lugar.