14.48 KILOMETROS PROVINCIAL ROAD SA MANTICAO, MAGGAMIT NA

Posted: June 22, 2020

22062020-9

MAHIMO nang maggamit ang 14.48 kilometros nga gipasementong dalan ni Gov. Bambi Emano sa lungsod sa Manticao, Misamis Oriental. Wala pa may pormal nga turnover niini tungod sa hulga sa coronavirus disease 2019, apan gimando sa gobernador nga ablihan na kini sa publiko.
Ang Manticao-Cabanlatian-Mahayahay-Limunda Provincial road sa nasangpit nga lungsod isa sa mga major road projects sa pamunuang Emano dinhi sa Misamis Oriental sa tumong nga mahagkapan intawon ang inadlaw-adlaw nga galastuhan sa molupyo sa Cabalantian, Mayahayay, Limonda ug uban pang kasikbit nga kabaranggayan sa lungsod sa Manticao.
Sa wala pa kini masemento, daghang matumba nga motorsiklo ug habal-habal, ug plitehan nga halos mokabat sa P500 ang one-way trip.
Matud ni Provincial Engineer Mario Batar, dili tiaw nga hagit ang ilang nasinati sa pagsemento ning maong mga dalan, hilabina panahon sa ulan, ug uban pang makalilisang nga hulga sa ilang kinabuhi.
Ang pundo sa nasangpit nga proyekto gikan sa conditional matching grant to provinces (CMGP) sa Department of Interior and Local Government (DILG).