Dako ang kalipay sa pamunuan ug mga healthcare workers sa Misamis Oriental Provincial Hospital (MOPH) Claveria human madawat ang 19 ka bag-ong hospital beds nga dugang pasilidad alang sa pag-atiman sa mga pasyente. Sumala kang Dr. Pilardo Ledesma, Chief of Hospital sa MOPH Claveria, dugay na nilang gihandom ang pag-abot sa bag-ong mga hospital beds tungod sa nagkadaghan nga pasyente nga ilang gialagaran. Matud pa niya, dako kini nga tabang aron mas mapalambo ang kalidad sa serbisyo ug masiguro ang komportable nga pagpahimutang sa mga pasyente sulod sa ospital. Ang maong paghatag sa bag-ong hospital beds kabahin sa padayon nga paningkamot sa Provincial Government sa Misamis Oriental sa pagpalig-on sa serbisyo sa panglawas sa tanang walo (8 ka Misamis Oriental Provincial Hospitals. Kabahin usab kini sa giuna nga prayoridad ni Governor Juliette Uy nga mapauswag ang kahimtang sa mga provincial hospitals pinaagi sa paghatag og modernong pasilidad ug mga ekipo alang sa kaayohan sa tanang Misamisnon.
Samtang nagpadayon ang distribusyon sa mga bag-ong hospital beds, gilauman nga sa mga umaabot nga mga adlaw, ang ubang Misamis Oriental Provincial Hospitals (MOPH) usab maoy sunod nga pagahatdan sa maong mga hospital beds, isip kabahin sa padayon nga pagpalig-on sa mga serbisyo sa panglawas sa tibuok probinsya. Nagpasalamat usab ang MOPH Claveria sa suporta sa administrasyon sa probinsya ubos sa liderato ni Governor Juliette Uy ilabina sa padayon nga pagtagad sa panginahanglan sa sektor sa panglawas.
Ang bag-ong mga hospital beds gilauman nga makatabang sa paghatag og mas episyente, luwas, ug komportable nga serbisyo alang sa matag pasyente nga mosalig sa MOPH Claveria.
By: Kendra Pacaldo/PIO
Hulagway kuha ni: Marvin Gilig/PIO
