GITABANGAN sa Kagamhanang Probinsyal ang dise nuebe (19) ka mga rebeldeng bag-ohay lamang nisurrender niadtong Mayo 25, 2026. Gipaagi sa progamang Assistance to Individuals in Crisis Situation (AICS) ang hinabang nga gitunol kanila. Matod ni “Shaggy”, dakog tabang kanila ang assistance tungod kay maka-abag kini sa ilang pangadlaw-adlaw nga panginahanglanon sa ilang pamilya, labina nga duol na ang ting klase. Gibutyag ni Shaggy nga nabati nila ang kalisod sa ilang kinabuhi sa kabukiran hinungdang nibalik sila sa sabakan sa gobyerno.

Mapasalamaton si Shaggy kang Governor Juliette Uy sa paghatag kanila og mainitong pag-abiabi panahon sa ilang pag surrender ug sa iyang pagpaningkamot nga matabangan ang mga former rebels sa ilang panginabuhian. Baynte (20) ka tuig si Shaggy nga nahimong aktibista, ug dose (12) ka tuig nga nahimong myembro sa New People’s Army (NPA) nga naglihok sa esteng bahin sa Misamis Oriental. Nahisubay ang maong programa sa padayong pagpatuman ni Governor Uy sa National Task Force to End Local Communist Armed Conflict (NTF-ELCAC) nga nagtinguhang maundang ang insurhenisya ug mapabalik sa sabakan sa gobyerno ang mga rebelde.

Kauban sa Kagamhanang Probinsyal ang pwersa sa militar, pulis, ug mga private ug public stakeholders sa pagpatuman sa NTF-ELCAC. Naghinaut sa Shaggy nga magpadayon pa ang gobyerno sa paghatag og tabang kanila tungod kay aduna pud silay mahimong kontribyusyon sa pagpalambo sa nasod. Nanawagan ni Shaggy sa kabataan nga maglikay sa pag arsag armas kontra sa gobyerno tungod kay adunay dakong oportunidad ang gihatag sa gobyerno para makatabang sila sa katilingban, ug kanunay nilang huna-hunaon ang ilang mga minahal sa kinabuhi.

Magpadayon pa ang Kagamhanang Probinsyal sa paghatag og tabang sa mga former rebels isip usa sa mga direktiba sa Governor Uy nga mahatagan usab sila og plastar nga kinabuhi. Kabahin usab kini sa pagpatumn sa BANGON strategic agenda nga mapalambo pa ang lalawigan sa Misamis Oriental.

By: Nefilim Diaz/PIO

Hulagway kuha ni: Marvin Gilig/PIO