MALAMPUSONG mitunol ang Panggamhanang Probinsyal pinaagi sa Provincial Agriculture Office sa duha (2) ka units sa Silkworm Rearing House materials sa Sitio Linandang, Brgy. Malagana sa lungsod sa Claveria niadtong Disyembre 5, 2025. Kini kabahin sa nagpadayung paningkamot sa probinsya nga mapahingusgan ang mulberry ug sericulture industry sa Misamis Oriental. Ang mga benepisyaryo niini mao ang mga Indigenous Peoples (IP) sa Sitio Linandang Malagana Farmers Association Incorporated (LMFAI) sa pagpanguna nila LMFAI President Mr. Virgilio Linodhay ug LMFAI Secretary Ms. Jecil Reyes.
Matud ni PAGRO Senior Agriculturist Ms. Michelle Ross V. Lace, daghan ang mahimo nga kinitaan gikan sa sericulture sama na lamang sa paggama sa Barong Tagalog, gowns, handkerchiefs, linens, fashionable garments, men’s and ladies’ accessories, home furnishings, novelty/gift items ug uban pa. Dako ang pasalamat ni LMFAI President Mr. Virgilio Linodhay kang Governor Juliette Uy tungod sa suporta nga gihatag sa gobernadora sa ilang asosasyon.
Matud niini, naglisod sila sa miaging mga panahon gumikan sa kakulangon sa suporta apan karon dako niyang kalipay tungod nakita nila nga ang paningkamot sa kagamhanan nga matabangan sila sama na lamang sa suporta alang sa mulberry production, pagpaayo sa ilang kadalanan ug ang mga materyales alang sa ilang gipangandoy nga silkworm rearing house. Dugang ni Linodhay, dako og tabang ang mga materyales kay ilang nakita nga ang sericulture sayun nga trabaho apan dako og kinitaan nga makatabang sa ilang mga miyembro.
Subay kini sa pangandoy ni Governor Juliette Uy nga mahaw-as sa kalisod ug kapobrehon ang mga mag-uuma pinaagi sa paghatag og sustenable ug high-value agriculture programs aron magsilbing ilang panginabuhian. Misalmot sa kalihokan sila Provincial Agriculture Office Senior Agriculturist Ms. Michelle Ross Valmores-Lace, former Board Member Frederick Khu ug uban pa.
Kahinumduman, mitunol usab ang buhatan sa mga materyales ngadto sa Brgy. Sinalac Mulberry Farmers and Sericulture Farmers Association sa lungsod sa Initao niadtong Nobyembre 28 ning tuiga.
By: Jane Salimbao/PIO
Hulagway kuha ni: Marvin D. Gilig/PIO
