PSWDO MITUNOL OG SERBISYO SA MGA RESIDENTE SA BRGY. POBLACION, MAGSAYSAY

UBAY-UBAY nga mga serbisyo ang natagamtaman sa mga residente sa Brgy. Poblacion, Magsaysay human mibisita ang Provincial Social Welfare and Development office pinanguluhan ni Mr. Jhunleymar Abella.
Kini atol sa gihimo nga Adopt a Barangay Program dungan sa selebrasyon sa 30th National Filipino Family Week sa maong buhatan kon asa kapin tres sientos ka mga indibidwal ang aktibong misalmot.
Hilabihan ang kalipay sa mga residente sa nadawat nga kinilong bugas, grocery packs ug home appliances lakip ang magical show nga gikalipay og ayo sa mga kabataan.
Ang Barangay Poblacion sa lungsod sa Magsaysay laumang mahatagan og proyekto sa panubig nga nag-unang suliran nga sulbaron sa kagamhanan pinaagi sa PSWDO ubos sa Adopt a Barangay Program.
Tumong sa gobernador nga mahatagan og dakong pagtagad ang matag pamilyang Misamisnon dala ang paglaum nga maoy direksyon sa iyang pamunuan.

By: Jane Salimbao/PIO

Hulagway kuha ni: Marvin Gilig/PIO