GITUNOL sa Panggamhanang Probinsyal ubos sa mandato ni Governor Juliette Uy ang 22 ka mga hospital beds ug 3 ka wheelchairs alang sa Misamis Oriental Provincial Hospital (MOPH)-Magsaysay niadtong Hulyo 22, 2026. Kini personal nga gidawat ni MOPH-Magsaysay Chief Dra. Kathleen Ambal kauban ang mga personahe sa maong balay tambalanan. Matud ni Dra. Ambal dugay na nilang gipangandoy nga makabaton og bag-ong hospital beds tungod kay daan na ug nagkadaot ang pipila sa ilang mga kagamitan. Dugang niini, dakong tabang ang maong mga ekipo aron mas komportable ug mas hapsay ang pag-atiman sa mga pasyente nga ma-admit sulod sa ospital.
Dako ang pagpasalamat niini kang Governor Juliette Uy ug sa mga donor tungod aduna na silay magamit nga mga ekipo nga makatabang alang sa mas maayong pagserbisyo sa matag kliyente nga modangop sa ilang ospital. Kahinumduman, pormal nga giturnover gikan sa mga donor ang maong mga ekipo niadtong Hunyo 1 ning tuiga nga nahimong posible pinaagi sa pagpaningkamot ug koordinasyon ni Governor Uy.
Padayon pa ang paningkamot sa administrasyon ni Governor Uy nga matubag ang mga panginahanglanon sa mga balay-tambalan aron mas mapalambo pa ang serbisyo sa panglawas alang sa katawhan.
By: Jane Salimbao/PIO
Hulagway kuha ni: Charm Andy Pacamalan/PIO
