MOKABAT sa 268 ka mga sako sa salt fertilizer ang malampusong gitunol ngadto sa mga coconut farmers gikan sa lungsod sa Claveria niadtong Pebrero 27 ning tuiga. Nahimong benepisyaryo niini ang upat ka mga people’s organization gikan sa maong lungsod nga gilangkoban sa Poblacion Coconut Farmers Association nga nakadawat og 28 ka sako, Ane-i Coconut Farmers Association nga nakadawat og 160 ka sako, Sta. Cruz Coconut Farmers Association nga nakadawat og 12 ka sako ug Punong Coconut Farmers Association nga nakadawat og 68 ka bags.

Nahimong posible ang maong programa pinaagi sa pagtinabangay sa Panggamhanang Probinsyal pinaagi sa Provincial Agriculture Office ug Philippine Coconut Authority (PCA). Matud ni PCA Agriculturist I Mr. Marjun Brusas, dakong tabang ang asin sa pagpadako sa lubi tungod kay kini magsilbing fertilizer aron malikay sa mga kadaot ang tanom ug mutaas ang produksyon sa lubi subay sa ilang Coconut Fertilization Project. “Kining salt fertilizers, yearly ni sya nga ginahatag sa atong ahensya tungod kay kini proven and tested naman ni sya. Nag-undergo naman ni sya og examination or test sa field so napamatud-an ni sya nga makahatag ni sya og dugang kalamboan sa ilang pagpanguma labina sa ilang mga abot.”

Gawas niini, aduna usab sila programa pinaagi sa pagtunol og coconut seedlings subay sa ilang Massive Coconut Planting Project diin prayoridad ang mga rehistradong coconut growers ug marginalized coconut farmers. Dako ang pasalamat ni Ane-i Coconut Farmers Association President Ms. Arjay D. Ibale sa Panggamhanang Probinsyal ug sa ahensya tungod sa suporta nga gihatag alang kanila nga mga mag-uuma sa probinsya. Dugang ni Ibale, mas nadasig pa sila nga magtanom og lubi nga dako og tabang alang sa ilang sunod pa nga henerasyon. Magpadayon pa ang programa ug naglaraw nga matabangan ang mga coconut farmers sa pagproseso sa ilang pagtanom alang sa mas taas nga produksyon sa probinsya.

Tumong ni Governor Uy nga matabangan ang mga mag-uuma nga makabaton og dugang kinitaaan ug daghang mga opurtunidad sa tinguha nga mulambo ang ilang kinabuhi samtang mapalig-on ang industriya sa lubi sa lalawigan.

By: Jane Salimbao/PIO

Hulagway kuha ni: Mel Theresa Ruales/PIO & John Miko Amper/PIO-Intern (USTP)