3, 016 KA SAKO SA HUMAY GIDONAR SA PHILRICE SA MISOR

Posted: August 7, 2020

782020-5

NAGDONAR ang Philippine Rice Research Institute (Philrice) og 3,016 ka sako nga humay alang sa lalawigan sa Misamis Oriental.
Ang buhatan sa Provincial Agriculture Office (PAGRO) maoy magpagaling sa maong humay didto sa Zone -7, Lilo, Lumbo lungsod sa Lagonglong Misamis Oriental aron mahimo kining bugas.
Kung mahimo na kini nga bugas ihatag na gilayon kini sa buhatan sa Provincial Social Welfare and Development (PSWDO) aron malakip sa pagpang repack.
Moabot sa 750 ngadto 780 ka sako nga bugas ang nakaandam nga hinabang alang sa katawhan.
Matud ni Mr. Jhunleymar Abella ang ulo sa PSWD nga ipang apod-apod kini sa mga naapektuhan sa Corona Virus Disease (Covid-19) nga padayon pang gipakigbatokan karon sa lalawigan.
Lakip sa gitagan-an niini ang mga Senior Citizens ug mga Persons with Disability.
Sa iyang bahin gibutyag sab ni PAGRO Head Apollo Pacalaman nga dili basta-basta nga kahigayunan nga mahatagan ug pagsalig gikan sa PhilRice kay talagsaon kini sila mohatag og donasyon apan bulahan ang probinsya kay nahatagan ug napili niini gumikan sa dakong pagsalig ngadto sa liderato ni Governor Bambi Emano.
Gipaabot sab ni Governor Bambi ang dakong pasalamat ngadto sa Philrice sa paghatag donasyon sa Misamisnon gumikan dako kaayo kini og tabang sa mga nagkinahanglan nga katawhan ning padayon ang lalawigan sa pakigbatok sa makapatay nga virus.