Pormal nang giturn-over ang tulo (3) ka Water Tub Project ngadto sa katawhan sa Sitio Garden, Barangay Panampawan, Claveria, Misamis Oriental, nga maghatag og limpyo ug padayon nga suplay sa tubig alang sa kapin 150 ka panimalay sa maong lugar. Sumala kang Barangay Kagawad Eduard Humaynon, dako kaayo ang maong proyekto sa pagtabang sa mga residente tungod kay dili na sila maglisod sa pagpangitag tubig alang sa ilang adlaw-adlaw nga panginahanglan. Matud pa niya, dugay na nilang gihandom ang maong proyekto ug dako ang ilang kalipay nga sa katapusan nahimo kini. “Usa gyud kini sa among dugay nang gipangandoy. Dako kaayo ang kausaban nga madala niini sa among komunidad, ilabina nga adunay na kami 24/7 nga agas sa potable water,” matud ni Kag. Humaynon.

Gipadayag usab sa mga residente ang ilang dakong kalipay sa pag-abot sa maong proyekto. Sumala nila Esterlita Baculanta ug April Jebie Udarbe, sa milabay nga mga tuig napugos silang mobaklay og 500 metros hangtod usa ka kilometro matag adlaw aron lamang makasag-ob og tubig alang sa ilang pamilya. Karon, pinaagi sa maong proyekto, anaa na mismo sa ilang komunidad ang limpyo ug luwas nga tubig nga ilang magamit sa tanang panahon, nga dako kaayong kahupayan alang sa matag panimalay. Dako usab ang ilang pasalamat kang Governor Juliette Uy, nga wala magduhaduha sa pagtubag sa ilang hangyo nga mahatagan og maong proyekto. Matud sa mga residente, ang 3 ka Water Tub Project usa ka konkretong pamatuod sa pagtagad sa administrasyon sa gobernador sa mga batakang panginahanglan sa katawhan, ilabina sa mga komunidad nga dugay nang nag-atubang sa kakulang sa suplay sa tubig.

Ang maong proyekto kabahin sa padayon nga paningkamot sa administrasyon ni Governor Juliette Uy sa paghatag og mga programang makapauswag sa kalidad sa kinabuhi sa mga Misamisnon pinaagi sa pagpalapad sa access sa limpyo, luwas, ug lig-on nga suplay sa tubig, ilabina sa mga kabukiran ug lagyong kabarangayan sa probinsya.

By: Kendra Pacaldo/PIO

Hulagway kuha ni: Marvin Gilig/PIO