300 SINAKONG BUGAS, GITUNOL NI BATO SA MISOR

Posted: May 21, 2020

2152020-19

DILI sinakong saad ug sinakong bato, apan sinakong bugas ang gitunol ni Sen. Ronald “Bato” Dela Rosa dinhi sa Misamis Oriental niadtong Mayo 11, 2020, butang nga nakapahagkap intawon sa hibug-aton alang sa pagpadayon sa pakigbisog batok sa coronavirus disease 2019.
Mapasalamaton daku uyamot si Gov. Bambi Emano kang Sen. Bato, kinsa nagtamod sa iyang saad kaniadto nga sa bisan unsang oras o adlaw, ug bisan unsang sitwasyon ug kalisod, mobalik kini sa lalawigan aron motunol sa iyang hinabang nga gikinahanglan kaayo.
Nakatakdang bahin-bahinon ni Gov. Emano ang 300 ka sakong bugas sa 23 ka lungsod ug duha ka dakbayan sa tibuok lalawigan, aron maapod-apod sa tanang frontliners ug mga naglisod ning panahon sa krisis.
Ang hinabang nakalista na usab sa Transparency Donation Board ni Gov. Emano nga anaa nahimutang sa kapitolyo, aron masayod ang publiko kinsay mitabang, unsay gitabang ug hain kini mipadulong.