TINGUHA ni Governor Bambi Emano uban ang DepEd-MisOr nga mahimong mas epektibo ang paghatag pagtulun-an ngadto sa kabataan sa lalawigan hinungdan nga lakip sa gitunol niini pinaagi sa Local School Board (LSB) ang 400 units nga 50′ inches nga Smart TV.

Mobalor sa Php 10,400,000.00 ang kinatibuk-ang kantidad sa mga Smart TV’s ang natunol atol sa pagtapos sa Brigada Eskwela 2021 nga gipahigayon sa Patrocinio National High School, lungsod sa Claveria niadtong Septiyembre 6, 2021.

350 ka units gitagana alang sa mga magtutudlo sa lalawigan samtang ang nahibilin alang sa 50 ka mga child development workers.

Matod ni Misamis Oriental-Schools Division Superintendent Dr. Jonathan Dela Peña nga dako ang matabang sa mga smart TVs ngadto sa mga magtutudlo sa lalawigan sa paghatag pagtulunan sa mga magtutungha pinaagi sa digital nga format.

“Nalipay kaayo mi kay kani siya gamiton pud sa implementation sa bichronous learning kay ang atong mga maestra karon naghimo naman sila og mga digital resources (teaching resources in the digital format) ipangsulod nato siya sa USB tapos gamiton na siya ipansak sa smart TV for the people to view and to learn from.” Mapasalamaton nga pasabot ni SDS Dela Peña.

Lauman nga pinaagi niini mas mapasayon sa mga magtutudlo ang paghatag sa ilang serbisyo sa kabataan hilabina niining panahon sa new normal nga kinahanglan ang maong mga butang aron magpadayon ang natad sa edukasyon sa lalawigan.

(HULAGWAY KUHA NI JEZREEL ECUACION/PIO)