5 TOP SYMPTOMS SA COVID-19, BANTAYAN

Posted: June 8, 2020

862020-10

SA 14 nga simtomas aron masayran nga nataptan ang tawo sa coronavirus disease 2019 (COVID-19), ang top 5 symptoms niini maoy manipestasyon nga angay bantayan—hilanat, gahi nga ubo, hago ang paminaw sa lawas, dili ganahan mokaon, ug panakit sa kalawasan. Kung dunay ingon ani nga gibati ang tawo, kinahanglan na kini ipakonsulta sa eksperto.
Kini ang pahimangno ni Provincial Health Officer ug concurrent Provincial Task Force for COVID-19 chief Dr. Jerie Calingasan ngadto sa publiko hilabina sa mga empleyado sa kapitolyo probinsyal sa Misamis Oriental.
Apan, matud ni Dr. Calingasan, malikayan kini pinaagi sa pagsunod sa health safety protocols sa Department of Health (DOH), mao ang regular handwashing gamit ang sabon, pagsuot sa facemask, social distancing ug pagpuyo sa balay.
Gitataw sa eksperto nga motakboy ang makamatay nga virus pinaagi sa “person to person” contact mao nga kinahanglan gayud maglikay sa mga lugar nga daghan tawo, susama sa mall, merkado ug uban pang pampublikong lugar.
Tungod niini, gihangyo ni Dr. Calingasan si Provincial Administrator Atty. Jocelyn Lood-Mateo nga magbutang og dugang lavatories palibot sa kapitolyo aron batasanon sa mga empleyado ug mga kliyente sa kapitolyo ang pagpanghugas sa kamot matag oras; magbaton og thermometer ang matag opisina aron kaduha sa isa ka adlaw ma-monitor ang ilang temperature sa lawas isip kabahin sa disinfection ug health monitoring.
Gihangyo usab ni Dr. Calingasan ang tanang empleyado ug ang publiko nga batasanon ang pag-inom sa tubig, pag-inom sa Vitamin C aron kusog ang resistensiya batok sa bisan unsang matang sa virus.